Uji vetë nuk ndikon drejtpërdrejt në dobësim, por konsumimi adekuat i ujit është i lidhur ngushtë me dobësimin. Uji nuk ka ndonjë fuqi çudibërëse të djegies së yndyrave, por definitivisht mund t’ju ndihmojë që t’i arrini rezultatet e dëshiruara më shpejt.
Para së gjithash, hidratimi i mirë i trupit ndihmon në parandalimin e ngrënies së tepruar. Shumë njerëz nuk konsumojnë sasi adekuate të ujit dhe shpesh e ngatërrojnë ndjesinë e etjes me ndjesinë e urisë. Nëse keni ngrënë kohët e fundit, dhe ndiheni të uritur, pini disa gota ujë dhe do ta vëreni se në fakt ishte etja.
Nëse megjithatë jeni të uritur edhe 30 minuta pas pirjes së ujit, atëherë bëhet fjalë për urinë.
Gjithashtu, mos harroni se në qoftë se gjatë gjithë kohës do të merrni sasi adekuate të ujit, kjo ndjenjë e rreme e urisë nuk do të shfaqet më apo do të shfaqet shumë më rrallë.
Për t’u siguruar që po konsumoni sasi adekuate të ujit, kushtojini vëmendje ngjyrës dhe erës së urinës. Ajo duhet të jetë e verdhë e zbehtë dhe pothuajse pa erë.
Në qoftë se merrni sasi adekuate të ujit, kjo do të thotë se do të konsumoni më pak pije të tjera që përmbajnë sheqer dhe kalori të zbrazëta, dhe e nxisin akumulimin e peshës së tepërt.
Në përgjithësi, konsumi adekuat i ujit nuk do të bëjë çudira për linjën tuaj, por do të ndihmojë në procesin e përgjithshëm të dobësimit, transmeton koha.net. Gjithashtu, duhet të dini se konsumi adekuat i ujit është themeli i një jetese të shëndetshme.
Sidoqoftë, duhet ta dini se me konsumin e ujit mund ta teproni. Këto janë raste të rralla, por ekzistojnë. Pini ujë rregullisht dhe mos harroni se shumë ushqime dhe gjellë kanë një përmbajtje të lartë të ujit si shalqiri, pjepri, pjeshkat apo nektarinat.
